Breaking News
Home - National Highlights - Dife i detri en younit dan en blok flat Corgat Estate

Dife i detri en younit dan en blok flat Corgat Estate

difeDife in detri de lasanm anler dan en younit ki trouve dan en ansyen blok flat kat younit dan leo Corgat Estate yer gran maten.

Section leader kot Servis Tenny Dife ek Sovtaz Msye Joe Gabriel ti dir ki ti anviron 4er30 yer bomaten ki stasyon Servis Tenny Dife santral ti ganny alerte ki ti annan sa dife.

Msye Gabriel ti dir ki deswit de kanmiyon ti ganny deplwaye sorti Nouvo Por pour al donn lasistans.

Ti pran anviron 2 minit pour kanmiyon ariv kot sa dife e dapre Msye Gabriel ler zot ti ariv Corgat Estate kot sa bann flat, son bout anler ti konpletman anflanm.

«Dife ti’n propaz dan sa de lasanm anler e ti pran 5 minit pour met dife anba kontrol. Bann lasanm anba ti ankor entak eksepte sa leskalye ki desann anba. Dife ti pe fer semen pour bouz anba me nou’n fer lesansyel pour aret li,» Msye Gabriel ti dir.

Sa dife in osi afekte de lezot younit obor li, sirtou dan zot plafon e miray ki’n fele.

«Vi ki sa de miray sa lakaz in fele ladministrater distrik ek Minis pour Litilizasyon Later ek Lakaz in anvoy en enzenyer pour evalye si lakaz i sen e sof pour sa bann lezot fanmiy dan sa blok flat kontinyen reste ladan,» i ti dir.

1difeMsye Gabriel in dekri sa dife konman aksidantel okazyonnen par neglizans. I ti dir ki dapre zot rapor sa flat ti napa kouran e sa fanmiy 4 dimoun ti pe servi lalanp petrol ek labouzi pour ganny lalimyer.

Enn parmi sa bann dimoun ki reste dan sa younit ki’n brile, Elvis Françoise, ti dir ki lalanp ti’n bliye ganny tennyen e i sanble ki in tonm lo matla e se sa ki’n okazyonn sa dife.

Antretan ladministrter distrik Mont fleuri Jancy Volcère ti dir ki yer zot ti pou plas sa twra dimoun tanporerman kot Sunshine Guest House ki baze Mont Fleuri menm e ki ozordi, an kolaborasyon avek Minister Litilizasyon Later ek Labita zot pou regarde ki mannyer zot pou asiste sa bann dimoun avek en lozman.

Developers: Cyberwave