Breaking News
Home - National Highlights - En group dimoun aze i vizit plizyer landrwa lo Mahé

En group dimoun aze i vizit plizyer landrwa lo Mahé

1oldEn group anviron 200 sitwayen aze ti pas lazournen yer pe fer letour Mahé dan bis.

Sa i en aktivite ki ganny organize tou le 2-an par departman devlopman kominoter an kolaborasyon avek lasosyasyon bann dimoun aze.

Apre ki zot ti pran bis kot ansyen zarden zanfan anvil, zot ti fer larout Nor ver Bel Ombre epi pas par Glacis e desann tou lakot Les pour pas par Takamaka e al ver Was.

Zot parkour ti al fini kot Sant Biodiversite Barbarons kot zot ti fer en vizit avek bann gid pour aprann lo biodiversite lanvironnman. Sa ti swiv par en pti kwiz lo sa ki zot in aprann.

Bann gannyan sa kwiz ti resevwar en pti tokenn sorti kot Telly’s Modelling Agency (Terry Carolla), Lenstiti Kreol, Marie Clarisse, Konsey Nasyonal pour Lar (Nac) ek Lasosyasyon Mizisyen Sesel (SeyMas).

Pandan sa tour zot ti ganny sans vizit landrwa kot korser La Buse in swadizan kasyet son trezor Bel Ombre, Eden Island, Providence e menm La Plaine Ste Andre.

Responsab progranm ek aktivite pour 3enm-az dan departman devlopman kominoter Jenita Laporte ti dir ki dis dimoun ti’n ganny swazir dan sak distrik pour pran par dan sa aktivite.

“Tou le 2-an nou sanz 3enm-az dan bann distrik pour donn sans lezot ki pa’n zanmen ganny sans partisipe pour fer sa letour e se zot ki dir nou kot zot anvi ale,” i ti dir.

Madanm Laporte ti fer resorti ki bann dimoun ki ganny swazir i bann ki pirman dan klib ouswa lasosyasyon sitwayen aze dan zot distrik.

2oldI fer premye fwa sa lannen ki tou dimoun i al fer letour dan bis ansanm; oparavan sa aktivite ti ganny fer par rezyon e ti deroul pandan trwa a kat zour.

En sitwayen aze 74-an sorti Takamaka, Madanm Marie Azemia, ti dir ki partou kot lasosyasyon i dir li vini i profite pour ale.

“Mon toultan partisip dan sa bann aktivite e i fer premye fwa ki mon fer letour dan bis lo zil me oparavan mon’n ganny sans fer letour Mahé dan Cat Cocos e menm al Praslin ek La Digue,” i ti dir.

Sitwayen Roche Caiman Madanm Arcenia Fiawornu ti dir ki i annwiyan (boring) kot lakaz alor i pran sa sans pour fer en pti letour.

“Ler ou ariv sa laz napa landwra pour ale okontrer ler ou ganny envite i pli bon pour ou,” i ti dir.

Msye Frank Cesar, ki en sitwayen Port Glaud, ti dir ki sak fwa bann aktivite i ganny organize i vini e si i pa vini fodre i malad.

I ti dir ki i’n desann pour fer en lapronmenad ansanm avek bann dimoun aze, bann dimoun ki i pa zwenn souvan.

“I bon ler nou vini nou zwenn kanmarad nou koze apre i detann nou en kantite ler nou pa reste kot lakaz,” i ti azoute.

Source : Seychelles NATION

Developers: Cyberwave