Breaking News
Home - National Highlights - Lafet Lendepandans/Lazournen Nasyonal

Lafet Lendepandans/Lazournen Nasyonal

2parad

1parad

Preparasyon pour parad i entansifye

Preparasyon pe entansifye pour parad ki levennman enportan e tradisyonnel ki mark Lazournen Nasyonal, ki sa lannen i koensid avek 40enm lanniverser nou lendepandans.

Yer apremidi, 3enm gran repetisyon sa levennman tre popiler parmi piblik ti deroule Stad Linite.

Bann manm komite lorganizasyon Lafet Nasyonal enkli son tyermenn Vis-Prezidan Danny Faure, ti osi asiste sa preparasyon.

Preski en trantenn platoun pou dan sa parad sa lannen. Sa i konpri  tou bann lafors militer, lapolis, Servis Tenny Dife ek Sovtaz, mouvman lazenes, Scouts, Duke of Edindurg International Award, osi byen ki 4 platoun sivilyen ki’n ganny mobilize sa lannen spesyalman pour mark sa 40enm lanniverser lendepandans.

Dan sa 4 platoun sivilyen, 2 se bann travayer sorti dan diferan lorganizasyon sekter piblik ek prive e 2 lezot i bann sitwayen aze sorti enpe partou dan bann distrik ki’n mobilize pour montre nou lafors travayer pandan sa dernyen 40-an.

Letan i ti koz avek lapres apre sa preparasyon, Msye Gerard Lafortune, enn banm manm komite lorganizasyon, i dir komite i satisfe avek bann preparasyon ziska prezan la ki i reste zis en dernyen preparasyon final Lendi swar.

«I’n annan en kantite preparasyon e la tou keksoz pe tonm anplas e i reste nou enn de bann pti latous final pour mete e nou pou korek pour le 29,» Msye Lafortune i dir.

«Sa lannen apard son laspe tradisyonnel parad pou annan serten nouvo formasyon, nouvo platoun 3enm az osi byen ki 4 posibleman 5 platoun lafors etranze. I premye fwa ki nou pou annan sa kantite etranze,» Msye Lafortune i dir.

I ti dir ki sa ki pou pli enpresyonnan sa lannen se lakantite avyon — anviron en douzenn — osi byen ki bann elikopter ki pou partisip dan flypast par lao stad sa zour.

Lo son kote, Lyetnan Kolonnel Simon Dine in dir ki preparasyon in deroul byen e bann zofisye militer in travay plizyer semenn avek bann 3enm az.

I annan zot ki bann militan ki annan sa leksperyans e sa lanvi pour partisipe e nou vreman satisfe ki mannyer preparasyon pe ale,» i ti dir.

Lokote flypast pour sa zour Msye Dine i dir sa bann lakonpannyen ki pe partisipe — Air Seychelles, Zil Air, IDC, Air Force — pe montre devlopman aeryen nou pti pei.

«Sa i en bon linisyativ e i pou montre nou kapabilite aeryen, devlopman ek progre ki nou’n fer pandan sa dernyen 40-an,» Lyetnan Kolonnel Dine i dir.

Source : Seychelles NATION

 

Developers: Cyberwave