Breaking News
Home - National Highlights - Pon ant Ile Aurore ek Perseverans i ekspekte ouver an Oktob

Pon ant Ile Aurore ek Perseverans i ekspekte ouver an Oktob

morganTravay pe byen progrese

Sa pon ki konnekte Ile Aurore avek Perseverans i ekspekte ouver an Oktob sa lannen, minis responsab pour transpor, Joel Morgan, in dir.

Minis ti dir sa yer pandan en vizit pour vwar leta progre travay lo sa pon.

I ti ganny akonpannyen par bann teknisyen sorti dan son minister, Minister pour Litilizasyon Later ek Lakaz (MLUH) ek Lazans Transpor lo Later (SLTA).

Minis ti dir i kontan pour vwar leta progre sa pon ki en oter 6.5 met par lao mare o an mwayenn.

«Mon satisfe avek sa ki mon’n vwar ozordi. Mon vwar ki nou’n kapab fini premye letap sa proze dan letan nou ti’n prevwar e mon pe pous tre for pour nou kapab fini larestan atan pour ed enpe sa problenm konzesyon trafik dan bomaten ek apremidi,» i ti dir.

I ti osi fer resorti ki sa pon, ki tre larz, i kapab anmenn kat lale transpor e i annan son koulwar pour diferan servis tel ki elektrisite, delo ek telekominikasyon.

I osi annan son lespas pour fer trotwar pour bann pyeton.

I relye avek sa semen ki pou sorti kot bazar pwason Anse Etoile ziska Perseverans an pasan par Ile Aurore.

Sa pon, ki ti premye letap sa proze by-pass, in kout R22 milyon e pour le moman MLUH pe tender dezyenm faz sa proze e i ekspekte konmanse an Zen e fini ver lafen Septanm.

Apre sa SLTA pou met en sirfas koltar de lale lo sa semen.

ponMinis Morgan ti dir ki plitar zot pou fer li vin kat lale pour sa senp rezon ki semen ki pe ganny fer lo Perseverans i pa en semen final me plito en akse ki pou ganny servi konman en by-pass pour le moman.

«Son semen final pou pas pli anndan dan lagon e i pou zwenn sa bout zil Perseverans. I osi annan en bout konblaz ki nou bezwen fer la pour sa e pour le moman mon panse ki ver milye ouswa lafen Oktob nou ava fini fer sa premye seksyon by-pass pour ariv ziska kot larantre Perseverans kot ron pwen,» i ti dir.

I ti eksplike ki sa by-pass pou ede tir konzesyon ki form parti plan Victoria by-pass ansanm avek en dezyenm pon ki pe konnekte Ile du Port avek sa lespas obor kot batiman Espace epi en semen ki pou kontinyen dan lavil pour al Sid.

«I pou ede deblok en kantite trafik ki pri sorti dan Nor dan bomaten, sirtou avek trafik ki pe al lekol Independent. I pou ed bann dimoun ki pe al dan Sid ouswa dan lavil e menm lo kote Was,» minis in dir.

I ti osi vizit sa dezyenm pon ki pe ganny fer ant Ile du Port ek Espace e dapre minis malgre travay lo sa enn pon in enpe retarde, i osi pe ekspekte ouver an Oktob ansanm avek sa lot.

Source : Seychelles NATION

Developers: Cyberwave