Breaking News
Home - National Highlights - Proze 24 lakaz English River pou demare ver lafen lannen

Proze 24 lakaz English River pou demare ver lafen lannen

2unionPremye faz konstriksyon 64 younit lakaz i ekspekte konmanse ver lafen lannen Union Vale dan distrik English River e sa i form parti proze ‘24 lakaz dan 24 distrik dan 24  mwan’ ki Prezidan Danny Faure ti anonse dan son diskour lo Leta Lanasyon pli boner sa lannen.

Depandan lo finansman, sa distrik i osi ekspekte vwar en morso semen ki zwenn Ma Joie avek Mon Signal grandi e larzi.

Prezidan Faure, akonpannyen par Minis Dezinyen Madanm Macsuzy Mondon, ki osi responsab pour bann zafer kominoter ek son sekreter prensipal Madanm Marie-Celine Vidot, sekreter prensipal responsab pour departman sosyal dan Minister Zafer Lafanmir Madanm Linda William Melanie, bann manm lotorite sa distrik, reprezantan tou bann lazans parey departman transpor, lakaz ek lezot ti vizit sa 2 proze yer bomaten.

Apard sa 2 proze, Prezidan Faure ti profit sa moman pour enterakte avek bann dimoun dan sa kominote, ekout toudsort kalite konsern ek problenm ki zot ti anmenn a son latansyon.

3unionParmi tou sa bann problenm, sitiasyon lakaz sa bann dimoun ti pli pertinan e i annan ki kondisyon ki zot pe reste ladan ti vreman deplorab e Prezidan Faure in pran not tousala e ankouraz sa bann dimoun pour annan ankor enpe pasyans.

Apre son vizit Prezidan Faure ti annan en rankont avek lotorite distrik ek reprezantan tou bann lazan.

“Sa ki nou’n kapab vwar ansanm lo teren se bann problenm dimoun me nou annan bann striktir dan distrik ki pe fer en bon travay e ki konn problenm bann zabitan e mon ti a kontan nou kontinyen travay koumsa,” Prezidan Faure ti dir.

I ti fer resorti ki sa ki enportan prezan se fason sa bann problenm ek konsern sa bann zabitan i ganny anmenn kot i neseser atraver sa bann striktir gouvernman pour evite ki dimoun i fristre.

4unionMinis Mondon lo son kote ti fer resorti ki Prezidan Faure in tre atantif a tou sa ki in vwar pandan sa vizit e in not tou sa bann konsern ki bann zabitan in anmenn a son latansyon.

I dir ki apard bann proze spesifik Prezidan Faure in osi al vwar pour limenm bann problenm striktirel avek lakaz vye dimoun sa distrik osi byen ki ekout konsern ki bann rezidan i annan e diskit avek reprezantan bann diferan lazans ki ti prezan dan sa vizit lo meyer fazon pour adres sa bann problenm.

Msye Yves Choppy, sekreter prensipal responsab pour lenfrastriktir dan Minister pour Labita, Lenfrastriktir ek Transpor lo Later, ti dir apre sa vizit i annan 2 proze spesifik ki Prezidan in vwar landrwa kot zot pou sitye e sa i en proze lakaz anler Union Vale kot en proze devlopman lakaz pe al fer e diskisyon pe fer pour maksimiz sa teren e azout en 3enm letaz avek sa 48 younit ki ti’n deza konsevwar pour donn en total 64 younit.

“Sa proze i form parti proze ‘24 lakaz dan 24 distrik dan 24 mwan’ ki Prezidan Danny Faure ti anonse dan son diskour lo Leta Lanasyon e pour English River, son proze 24 lakaz i pou 1er faz devlopman sa landrwa e travay lo bann plan pe deza ganny fer e si tou i al byen, travay konstriksyon i ekspekte konmanse ver lafen lannen,” Msye Choppy ti eksplike.

Msye Choppy i dir depi lannen pase zot in konmans relocate sertenbann fanmir ki reste kot sa proze pou fer tanporerman Ile Perseverance e lezot pou ganny relocate dan bann proze dan lavil menm si sa pa ankor finalize. Me Msye Choppy i dir sa detrwa fanmir i annan swa pour retourn dan zot landrwa enn fwa sa proze i terminen.

Lot proze ki Prezidan Faure ti vizite ti en proze semen ki tonb anba departman transpor e sa i lagrandisman ek elarzisman en morso semen anviron 500 met ki sorti Ma Joie pour al zwenn avek Mont Signal e pour sa proze distrik ti’n deza fer demann ki sa semen i agrandi pour permet ki transpor osi byen ki pyeton i kapab servi an tout sekirite e ki ava osi permet bann bis SPTC deservi bann zabitan dan sa rezyon.

Msye Choppy ti dir apre ki in vwar sa proze Prezidan Faure in dir i ava diskit avek Minister Finans pour vwar si i posib pour trouv finansman pour sa proze kapab ganny fer osito posib.

Bann portre ki akonpanny lartik i montre Prezidan Faure avek son delegasyon pandan vizit yer.

Source : Seychelles NATION

Developers: Cyberwave