Breaking News
Home - National Highlights - Senpa i lans en nouvo kanpanny ledikasyon ek lenformasyon pour pti biznes

Senpa i lans en nouvo kanpanny ledikasyon ek lenformasyon pour pti biznes

senpaSenpa, sa lazans ki promouvwar pti biznes, in lans en nouvo kanpanny kot son bann zofisye pou al dan bann distrik pour donn lenformasyon bann dimoun ki annan zot pti biznes e osi bann ki anvi ou annan lide lans dan en pti biznes.

Sa kanpanny apele Road Mode ti lanse ofisyelman Vandredi pase par Minis Michael Benstrong ki responsab pour Lenvestisman, Lantreprenarya ek Devlopman Biznes, dan en pti seremoni kot biro Senpa, Camion Hall.

Prezan kot sa lansman ti osi sekreter prensipal sa menm minister, Madanm Marise Berlouis, sef ekzekitif Senpa limenm, Manmzel Penny Belmont, ladministrater bann distrik rezyon santral ki zot distrik i premye pour ganny vizite dan kad sa kanpanny, plizyer bann pti antreprener osi byen ki lezot ki pe anvizaze konmans en pti biznes.

Bi en tel linisyativ par Senpa se pour donn plis lenformasyon e osi edik dimoun ki deza pe fer zot pti biznes lo fason pour devlope, grosi, agrandi e reste dan biznes e donn lenformasyon bann ki pa konnen ki mannyer pour konmanse pour zot byen demare.

Sa kanpanny i osi pour redefinir rol Senpa ki depi son kreasyon an 2004 in sa lazans ki travay dir pour asir promosyon, devlopman e sikse bann pti biznes.
Dan remark pour lans sa kanpanny Minis Benstrong ti felisit Senpa pour en tel linisyativ e i ti demann tou dimoun pour profite e vin devan e rod lenformasyon.

Minis Benstrong ti demann Senpa pour asire ki en tel linisyativ kot son bann zofisye i reste konnekte avek kominote pti biznes dan bann kominote i kontinyen.
«Senpa i bezwen kontinyen focus lo bann pti pti biznes ki fek konmanse ki bezwen sipor e bokou lenformasyon,» Minis Benstrong ti dir.
I ti asir staf Senpa sipor son minister pour bann tel linisyativ.

Ler i ti pran laparol, Manmzel Belmont ti dir ki tou dimoun i deza konn Senpa e ki i fer, me avek sa kanpanny «nou pe vin kot zot pour ed zot enpe pli byen e montre zot kwa ki nou annan pour ofer e bann lazans ki nou travay avek pour kapab ed zot pli byen. Akoz i fasil pour konmans en biznes me i tre difisil pour reste dan biznes avek tou sa bann defi ki egziste me Senpa i la pour ed zot sirmont tou sa bann defi,» Manmzel Belmont ti dir.

Avek sa lansman Vandredi pase kot bann zofisye Senpa in zwenn bann dimoun dan distrik rezyon nor ek lavil, Sanmdi prosen bann zofisye Senpa pou dan distrik Takamaka e sak Sanmdi zot pou zwenn bann antreprener e fitir antreprener dan en diferan distrik.

«Sa bann ki pa konnen ki mannyer pour konmanse, bann ki annan zis en lide e osi bann ki’n konmanse me ki’n fel zot tou zot pe ganny envite pour vin devan e rod led avek bann zofisye Senpa dan zot distrik,» Manmzel Belmont ti dir.

Senpa in osi lans en nouvo map ki montre kot tou son bann pti antreprener i baze e ki biznes zot ladan e sa avek bann portre tre kolore zot bann prodwi. Sa i en promosyon dan limenm pour sa bann pti antreprener.

Apre seremoni lansman tou dimoun prezan ti ganny sans fer letour bann stall kot bann diferan partener ek lazans ki Senpa i travay avek pour ed bann pti antreprener. Sa i tel ki Komisyon Reveni (SRC), Fon Pansyon, lazans ki donn larzan pour pti biznes (SBFA), lasante,  lanvironman ek Servis Tenny Dife ek Sovtaz, e la zot ti kapab ganny plis lenformasyon.

Bann envite ti osi kapab swiv bann prezantasyon lo sa kanpanny e osi  prezantasyon lo bann pti antreprener ki pe fer byen dan zot biznes e ki mannyer zot pe adres e sirmont bann defi.

 

Developers: Cyberwave