Breaking News
Home - National Highlights - ‘Valer pour mwan, valer pour nou tou’

‘Valer pour mwan, valer pour nou tou’

1valerMwan Avril i dedye a ‘Pasyans’

‘Pasyans’ i valer ki pe ganny promouvwar pandan sa mwan Avril dan kad kanpanny ‘Valer pour mwan, valer pour nou tou’ inisye par Konsey Nasyonal lazenes (SNYC).

Valer pour sa mwan ti lanse ofisyelman par sef egzekitif SNYC Alvin Laurence dan en seremoni Vandredi apremidi kot Vilaz Prezidan Port Glaud.

Sa ti deroul dan prezans sekreter prensipal pour zafer sosyal Linda William-Melanie, manm Lasanble Nasyonal sa distrik Sultane Jacqueline, lezot zofisye, travayer lazenes, osi byen ki travayer ek zanfan dan vilaz.

Apre ki per laparwas ti fer en moman refleksyon e beni sa seremoni avek en pti lapriyer, Msye Laurence ti koz lo lenportans annan pasyans ki anmenn bonn rezilta dan lavi en dimoun.

2valerI ti remersye tou dimoun ki pe travay e ed sa bann zanfan ki i dir pa en louvraz fasil kot zot bezwen donn zot lafeksyon, zot konsiderasyon e annan bokou pasyans.

«Tou sa bann dimoun ki travay avek sa bann zanfan pa travay zis pour ganny en saler me zot travay akoz zot annan bokou lanmour ki zot anvi partaze. E zot travay pa fasil. I ranpli avek difikilte e zot bezwen bokou pasyans,» Msye Laurence ti dir.

Sa se akoz zot travay avek bokou zanfan ki zot bezwen donn bokou plis lafeksyon, konsiderasyon ek latansyon.

I ti alor dir mersi tou travayer prezan.

Msye Laurence ti osi konsey tou dimoun pour priy bokou akoz lapriyer i osi donn ou pasyans.

3valerSeremoni ti animen par en sanson par bann zanfan. Ti osi annan temwannyaz en travayer ki’n travay pour pli lontan dan fwaye, Monique Louise, e Dean Padayachy, en dimoun ki’n pas preski tou son lavi dan fwaye e ki ozordi in vin en adilt responsab.

«Zot bezwen kontinyen ‘focus’ lo en keksoz ki tou sa bann dimoun pe  sey fer pou zot. Aprann sa ki zot sipoze aprann e realize zot annan en valer,» Dean ti konsey son bann pti koleg.

Tou dimoun prezan, depi zanfan ziska bann envite, ti kol en fey papye avek en mesaz lo la lo en laform pye dibwa. Sak fwa sa bann mesaz i a ganny lir i ava fer tou dimoun reviv valer pasyans dan zot lavi toulezour.

Ti osi annan bann pti tokenn lapresyasyon par SNYC pour bann fwaye ki pe ede promouvwar sa bann valer e SNYC ti osi resevwar enn de la par vilaz.

Bann portre ki akonpanny lartik i montre serten moman for sa seremoni.

Source : Seychelles NATION

Developers: Cyberwave