Breaking News
Home - National Highlights - Zabitan Grand Anse Praslin i eksprim zot konsern avek Prezidan Michel

Zabitan Grand Anse Praslin i eksprim zot konsern avek Prezidan Michel

1presidentBann zabitan Grand Anse Praslin ti Zedi ganny lokazyon eksprim zot konsern e osi laspirasyon pour zot kominote avek Prezidan larepiblik Msye James Michel.

Sa ti atraver vizit ki prezidan ti fer dan sa distrik. I ti’n swazir Grand Anse Praslin koman premye distrik pour li vizite dan kad en seri vizit ki in progranmen pour li kapab evalye bann devlopman dan kominote atraver dyalog avek bann zabitan, e parey limenm in dir, «dekouver laverite».

Malgre lapli ki ti pe tonbe, Prezidan ki ti akonpannyen par minis responsab pour Devlopman Kominoter Vincent Meriton ti vizit 8 fanmir e osi 2presidententerakte avek bann lezot dimoun ki i ti rankontre.

I ti konmans son vizit kot lakour Madanm Julia Jeannevol dan en landrwa ki apel Collie Estate. Madanm Jeannevol ti’n swete vwar prezidan pour diskit en problenm personnel.

Dan sa menm sou distrik, prezidan ti osi vizit Msye Michel Vidot e son madanm, ki vey en ventenn zanfan dan en ‘day care’ kot zot lakour menm. Dan en konversasyon avek sa fanmir ki osi konpri de zenn adilt, zot ti koz lo bann size tel ki lanplwa bann zenn, latribisyon later pour fermye lo plato Amitié e osi problenm drenaz dan sa landrwa.

3presidentSa de dernyen size ti osi monte ler prezidan ti aret Amitié kot madanm Marie-Ange Lepathy. Sa fanmir ki reste zis deryer erport e kot i annan en dimoun ki pe viv avek dezabilite, ti osi soulev problenm move leta serten semen segonder e osi lozman, vi ki pour le moman zot pa kapab repar zot lakaz ou fer okenn nouvo konstriksyon lo zot propriete. Sa i akoz zot ankor pe esper desizyon Lotorite Laviasyon Sivil Sesel (SCAA) lo si zot bezwen kit sa landrwa, akoz i tro pre avek erport. Zot ti a donk kontan ganny en larepons lo sa size.

Msye Elie Esther ki reste St. Joseph ti osi konsernen par problenm drenaz. I ti osi demande ki i annan plis 5presidentlalimyer lo bann semen segonder.

Ler i ti asiz deor pour koz avek Madanm Georgine Esther devan son lakaz an tol Anse Kerlan, Prezidan Michel ti osi abord size lozman. I ti koz avek sa madanm ki viv avek set lezot dimoun enkli trwa zanfan, lo posibilite pour repar son lakaz. Prezidan ti egalman demann lotorite distrik pour rezourd problenm pti zanfan Madanm Esther, ki dir i annan 16-an depi ki in fer laplikasyon pour en lakaz e ki i pa ankor gannyen menm si i annan 6-an depi ki i pe peye.

Ler prezidan ti pe sorti kot sa lakaz, en manm lafanmir Esther ti profite pour demann Minis Meriton pour donn lakominote permisyon pour zer sant kominoter Anse Kerlan. In dir ki sa sant ki ti ouver an 6president1999, in reste ferme pandan sa dernyen 3-an.

Apre ki prezidan ti’n termin son vizit Grand Anse Praslin dan sou distrik Mont Plaisir kot madanm Violette Capricieuse ti dir li ki «nou bann reprezantan pa vizit nou ase souvan», son fiy Yuta ti annan sa pour azoute:

«Mon vreman kontan ki prezidan in vin vwar nou, mon ti pe esper sa moman avek enpasyans. Mon kontan ki prezidan in vwar avek son prop lizye sa ki pe pase Mont Plaisir.»

Sa ti enkli sirtou konstriksyon nouvo lakaz, menm si bann zabitan sa landrwa in fer resorti ki i ankor annan bezwen pour konstrir plis lakaz e repar bann ki’n avarye.

Emosyonnel e an larm, madanm Marisa Payet ki reste anse Kerlan e ki annan en zanfan 15 mwan ki bezwen latansyon medikal, ti osi dir ki i kontan ki prezidan in pas kot zot, akoz dapre li «bann politisyen pa ekout ase zot bann dimoun.»

Nou prezant serten portre tire par Romano Laurence pandan vizit Zedi.

Source : Seychelles NATION

Developers: Cyberwave