Breaking News
Home - National Highlights - ‘Zefor pour moderniz Lafors Defans i lo bon semen’

‘Zefor pour moderniz Lafors Defans i lo bon semen’

defansLannen pase Lafors Defans Pep Sesel (SPDF) in fransir plizyer letap dan son bann zefor ek plan pour li kontinyen modernize, sef sa lafors Brigadye Leopold Payet in dir.

Brigadye Payet i dir Air Force par egzanp in akonpli bokou kot in ganny ekipe avek plizyer nouvo lekipman parey nouvo progranm konpiter pour analiz lenformasyon apre bann misyon sirveyans.

Brigadye Payet ti pe koz pandan en seremoni Vandredi kot plizyer zofisye diferan ran ti ganny promote dan plizyer ran.

Brigadye Payet i dir Air Force in lannen pase promot 7 zenn pilot konman kaptenn lo zot trwa avyon e asir formasyon neseser pour 3 lezot fitir pilot an Sid Afrik ek en enzenyer an Ostrali.

«Ansanm avek Gard Lakot ek lezot brans larme zot in akonpli bokou e partisip aktivman dan bann legzersis konzwent avek lezot lafors etranze e dan plizyer loperasyon militer osi byen ki bann misyon imaniter pour rod e donn sekour bann dimoun an detres lo lanmer,» Brigadye Payet ti fer resorti.

I ti azoute ki si tou keksoz i al dapre plan, Air Force i ekspekte ganny en nouvo avyon Dornier avek Lenn pour konplemant son laflot pour ariv 4 avyon sirveyans.

«Dan lefitir nou pou kontinyen avek sa progranm modernizasyon ek restriktirasyon ki pou tous lezot younit e plizyer lezot sekter dan SPDF,» Brigadye Payet ti eksplike.

Brigadye Payet  ti fer resorti ki en lafors defans modern i bezwen reste azour avek bann devlopman ki pe pran plas ozordi e annan fleksibilite pour adapte fas a bann nouvo defi e fason fer an prenan kont sitiasyon lokal osi byen ki bann devlopman lo lasenn enternasyonal.

«Pour zwe nou rol pli aktivman dan devlopman Lekonomi Ble e pour fer fas a bann defi dan domenn maritim, pandan premye lanmwatye sa lannen nou pou pli ekipe pour ‘monitor’ e fer bann loperasyon avek plis sikse dan nou zòn ekonomik ekskliziv. Sa pou vinn atraver komisyonnman nou ‘Coastal Surveillance System’, en proze konzwent avek gouvernman Lenn,” Brigadye Payet ti fer resorti.»

I ti azoute ki travay lo revizyon ‘Defence Forces Act’ pour moderniz sa morso lezislasyon e met li azour avek realite ozordi i ekspekte konplete sa lannen.

«Sa revizyon i ava donn nou lafors, espesyalman Gard Lakot, bann pouvwar ek zouti legal neseser pour zot kapab desarz zot responsabilite dan en kad legal pli apropriye e adapte fas a sirkonstans aktyel ek devlopman fitir,» Brigadye Payet i dir.

I ti fer resorti ki pour sa lannen lanfaz pou kontinyen mete lo devlopman moral, sivik ensi ki spirityel bann manm lafors atraver ranforsman bann progranm ledikasyon sivik neseser.

Source : Seychelles NATION

Developers: Cyberwave