Breaking News
Home - news - 6enm edisyon ‘Sesel I Annan Talan – Konpetisyon Eksploziv Talan’

6enm edisyon ‘Sesel I Annan Talan – Konpetisyon Eksploziv Talan’

Bann gannyan i donn zot lenpresyon lo zot parkour ek lakonplisman

 Par M. Julie

Group ladans Emergency Crew, santer Aubrey Farabeau ek Anea Andoise e poet Annadrey Celestine ek Derika Rath i bann gran venker sizyenm edisyon ‘Sesel I Annan Talan – Konpetisyon Eksploziv Talan’ organize par Jj Spirit Foundation. Sa gran final ti fer dan Sant Konferans Enternasyonal Sanmdi le 26 Me.

Konman pri bann gannyan ti resevwar R60,000; en Ipad; 2 nwit lo ‘full board’ lo Desroches (e sa i enkli tiket avyon ale-retour) e loportinite lantrennman dan zot kategori ki pou ganny aranze plitar.

Zournal Seychelles NATION i fer en pti konversasyon avek bann gannyan pour konn enpe zot parkour e ki mannyer zot santi zot apre ki zot in sorti venker dan zot kategori respektiv.

Derika Rath, gannyan konpetisyon poenm kategori 18 a 35-an

2talan“Mon pou pran nenport loportinite ki vini pour mon al pli lwen posib avek lapoezi”

Derika Rath i venker konpetisyon poenm dan kategori 18 a 35-an. I dir ki i pou kontinyen ekrir poenm e nenport ki loportinite pozitiv ki vin dan son semen i pou pran pour al pli lwen posib avek lapoezi.

Derika i annan 28-an e reste La Louise. I travay lo erport enternasyonal avek divizyon Imigrasyon. Derika i dir nou ki mannyer i ti okouran sa konpetisyon:

«Ti atraver Manmzel Stephanie Joubert ki mon ti ganny en kou-d-telefonn e i ti demann mwan akoz mon pa partisipe. Mon ti dir li mon a regarde ki mon pou fer e finalman mon ti deside pour anrezistre dan sa konpetisyon.»

Derika i pa en manm Fondasyon Jj spirit.

«Mon kontan ekrir poenm e zot baze bokou lo mon bann leksperyans lepase e osi mon bann lemosyon. Poenm i sa form lar ki en don e talan natirel dan mwan. Mon pa’n deza partisip dan okenn konpetisyon oparavan, sa i premye,» Derika i dir.

I ti azoute ki lamazorite letan i vin detrwa laliny dan son lespri, e la i asize e konsantre lo la e elabor sa detrwa fraz.

Konsernan tenm ki ziri ti swazir, ki ti ‘Eksploziv Talan’, Derika i dir pa ti tro difisil pour li ekrir lo la.

«In zis vin parey en konklizyon pour tou sa ki nou ti pe fer ziska sa final,» i ti eksplike.

Konsernan tit son prop poenm – ‘Strength of a Woman’  – Derika ti dir ki sa ti vin an vi ki i ti vwar li dan sa gran final ant de zonm. Alor moral sete pour lev valer bann madanm.

Lo ki i panse lo Jj Spirit pour organiz en tel konpetisyon, Derika i annan sa pour dir :

«I vreman enteresan akoz dan sa parkour mon’n ganny sans pour aprann en kantite. Par egzanp lo la fason ki ou konport ou lekor lo en lasenn ek bann teknik ki ou servi pour donn en bon prezantasyon ou lodyans. Mon’n menm rankontre nouvo dimoun e fer nouvo zanmi.»

Konpetisyon in fini, ki lot letap la?

“I annan sa de platform – “Word Up” ek “Bling Bling” — ki mon zanmi avek. Kan mon ganny sans mon al partisip avek zot e prezant mon bann poenm. Mon pou kontinyen koumsa menm e nenport ki loportinite pozitiv ki vin dan mon semen mon pou pran pour al pli lwen posib avek lapoezi.

 ‘Emergency Crew’, gannyan konpetisyon ladans

“Ti en parkour enteresan me avek bokou defi”

Group danser Emergency Crew, ki konpri Wilnette Joseph, Gael Guichard, Neryl Fanchette, Diane Hoareau ek Ronny Marengo (lider), ti venker konpetisyon ladans dan ‘Sesel I annan Talan – Eksplosiv Talan 2018’.

Akoz sa non Emergency Crew? Ronny i eksplike: “Sa non Emergency Crew in vin ler nou ti pe danse dan distrik Anse Royale 10-an pase. Sa letan ti bann ‘past members’. Nou ti vin avek sa non senpleman akoz nou kree ladans enn deryer lot e vi ki sa letan nou ti pe konmans popiler atraver bann aktivite lazenes kot ti annan en kantite spektak kiltirel kot nou ti bezwen kree bann ladans dan en pti moman letan.  Alors nou ti vin avek sa non ‘Emergency’ e nou’n met ‘crew’ avek.”

Ronny ti kontinyen an dizan ki menm ki parmi bann manm ki ti la avan i annan ki’n ganny zanfan e alor zot annan plis responsabilite, zot ankor touzour form parti Emergency Crew.

“Selman pour konpetisyon sa nivo nou bezwen bann manm ki delivre. La mwan konman lider, mon’n apros enn de nouvo manm laz 19 a 22-an. Nou ti formen pour premye lansman sa konpetisyon ‘Sesel I Annan Talan’. Konmela nou fer en mazorite spektak Cable Tune Award, spektak dan lotel, bann spektak varyete par lekol e menm dan nouvo klip video santez lokal Taniah avek tit sanson ‘Gard zot lopinyon pour zot’. Nou bann manm i menm swiv laklas preski toulezour kot lekol ladans kot zot partisip dan bokou latelye aletranze e anplis ganny bann lesanz ladans.”

Vi ki zot ti dan lansman sa konpetisyon konman en group avan, Ronny i dir ler zot ti aprann ki ti pou annan en lot konpetisyon ankor sa lannen, zot ti dir akoz nou pa partisipe. Annefe, Ronny ti azoute, ti sipoze annan 6 zot dan group. Me de ti abandonnen dan lanmwatye semen.

“Kapasite perform dan en group i plis travay. Ou bezwen fer sir ki tou mouvman i ansanm. Selman i pli fasil pour demontre en zistwar atraver ladans ek lakantite e nou menm kapab kontribye lenerzi ansanm ek kanmarad lo stage,” i ti dir.

Lo kote stil danse, Ronny i dir ki konman en lider sa bann stil danse i vin atraver leksperyans dan lekol ladans e menm son prop kreativite. Me i admet ki sa parkour pa ti enn fasil.

“Nou fer en kantite resers kot Lenstiti Kreol pour vin avek lide. Nou ti regard regard dan liv pour aprann telegraf mouswar;  lo lesklav; rod lenformasyon lo ladans rock ‘n’ roll ki en danse ki nou pa’n zanmen fer … nou travay konze piblik, Dimans nou reste ziska tar dan lannwit. Nou’n dispit, nou’n byen. Ti en parkour enteresan me avek bokou defi.”

Lo swa manm ziri ki ti an Kreol, Ronny i dir ti en defi kot zot ti demontre en ladans an servan mouswar – telegraf mouswar — e dezyenm swa ziri ti dan final kot nou ti ganny en sanson par Sam Smith ‘One day at a time’ e la nou ti montre en ladans baze lo ‘bullying’ ki mon krwar ozordi in fer nou venker.

Alor ki lavenir Emergency Crew? Eski i annan en fitir pour en latroup ladans?

“Nou’n toultan aktiv pandan sa 10-an. Avek sa kantite kou-d-telefonn ki pe dir ‘vin dans isi, vin dans laba’, mon krwar nou pou reste vivan. Si nou zwenn nou target, nou pou fer en spektak an Out e nou pou envit bann manm ki ti dan konpetisyon. E sa pour nou demontre nou lakonplisman e ki nou merite en tel pri.”

Lo Jj Spirit pour organiz en tel konpetisyon pour dekouver talan bann zenn, Ronny i dir i fer 6-an zot pe organiz sa konpetisyon e in swiv tou le 6 malgre toultan ti annan zis sanson.

“Mon pou debout fyer pour mwan dir dan nou pti Sesel, talan pe kontinyelman ogmante e i difisil pour zize. Ladans ek lapoezi i nouvo e si zot pe demontre sa nivo koumsa ki pou arive dan prosen konpetisyon? Lorganizasyon ti ekselan. Mon kapab dir nou’n ganny okipe byen. Pri i bokou pli enteresan alors i annan plis lankourazman.”

Lo lapar Emergency Crew, Ronny i remersye bann manm son group, sa de lezot tim ki ti dan final, paran e zanmi ki’n la tou dilon parkour.

3talanAubrey Farabeau, gannyan konpetisyon sanson kategori 18 a 35-an

 “Mon vreman kontan sante”

Aubrey Samuel Farabeau i en zenn 24-an ki reste Amitié, Praslin. I ti al lekol primer Grand Anse Praslin, apre lekol segonder St Joseph. Pour son letid pos-segonder i ti al Seychelles Institute of Technology (SIT) kot i ti etidye sarpantye. Aubrey i dir lontan son fanmiy ti konsey li pour partisip dan ‘Sesel I Annan Talan’, me li i pa ti ankor santi li pare. Pour sa enn konpetisyon se son papa ki ti al rod form e ti ankouraz li pour pran par. Aubrey i osi en manm Jj Spirit, organizater konpetisyon.

“Mon vreman kontan sante e se sa ki mon fer de mye. Konman mon prop swa mon sant avek tou keksoz ki mon pe fer. Dan konpetisyon mon ti sant Don’t Wanna Miss a Thing par Aerosmith. Se mon girlfriend ki ti sizer sa sanson e mon ti vreman kontan. Mon ti anvi swazir en sanson ki pa tro popiler Sesel e ki personn pa ti pou sante. E pour final mon ti deside sant Take me to Church par Hozier. Mon girlfriend ti osi sizer sa sanson ki mon osi kontan,“ Aubrey i dir.

Aubrey ti dir ki i ti deside partisip dan kategori sanson akoz se sa ki i fer pli byen – sante – menm si i pan’n zanmen partisip dan en konpetisyon sanson avan.

Lo ki i panse lo Jj Spirit pour organiz en tel konpetisyon: Aubrey i dir:

“Mon krwar i en gran loportinite pour tou partisipan. I vreman ‘entertaining’ pour bann lodyans. I osi donn nou bann zenn en sans pour fer en keksoz ki annan sans olye tonm dan bann move lenfliyans.”

Konpetisyon in fini, ki lot letap la? Aubrey i eksplike:

4talan“Prezan mon ti a kontan konmans mon prop karyer lanmizik; rikord en albonm e kontinyen avek sa ki mon kontan fer – sante. Mon oule servi sa loportinite pour mwan bouz pli devan dan mon karyer lanmizik.”

Aubrey i oule remersye tou dimoun pour zot sipor.

“Ti vreman enkrwayab pour mwan ganny de pri – ‘People’s Choice’ ek premye pri. Mon osi oule remersye Jj Spirit, SBC e tou dimoun ki’n kontribye dan lorganizasyon. Ti en gran leksperyans e mon’n aprann bokou. Felisitasyon tou bann lezot kontestan.”

Annadrey Celestine, gannyan konpetisyon poenm kategori 12 a 17-an

“Prezan mon pe al konsantre lo ekrir zistwar”

Annadrey Celestine in dir ki apre son viktwar dan kategori poenm 12 a 17-an, i pou aprezan konsantre lo ekrir zistwar vi ki i abitye ekrir. Annadrey ti dir nou sa dan en konversasyon ler i ti pe reflekte enpe lo son parkour dan sa konpetisyon.

Apard ki sorti gran venker konpetisyon poenm kategori 12 a 17-an, Annadrey ti osi gannyan pri ‘People’s Choice’ dan menm kategori dan konpetisyon ‘Sesel I Annan Talan – Eksplosiv Talan 2018’. Annadrey ti kaptir latansyon lodyans ensi ki manm ziri avek son de poenm ‘Nou Talante’ e ‘Kot I Ale’. Dan en pti entervyou, apard ki koz lo son pri ek son parkour dan sa konpetisyon, Annadrey ti osi donn son pwennvi lo organizater levennman, Fondasyon Jj Spirit menm ki i pa en manm.

Annadrey i reste Pascal Village, i lekol Lakademi Letid Biznes e Kontabilite e i fek ganny 18-an. I ti okouran en tel konpetisyon atraver lavertisman lo televizyon.

“Mon ti vwar li en loportinite vi ki mon abitye ekrir. Prezan mon dir ‘why not’, ale. Mon abitye ekrir poenm me la mon pe ekrir zistwar,” Annadrey i dir.

Annadrey i dir ki i annan en tenm spesifik ki i kontan baz son poenm lo la e sa se zenn.

“Zenn mon laz oubyen pli pti. Sirtou adolesan akoz vi ki mwan osi tou mon en zenn mon konpran. Apre mon obzerv marnmay ki diferan avek mwan akoz mon kontan obzerve, gete kwa ki fer zot koumsa. Akoz adilt i vwar nou en tel mannyer. Si i annan en leson lo la mon esey montre zenn ki leson apre mon esey montre adilt akoz zenn i tant pour kontan sa bann ‘ensinifyan’ si ou kapab dir, sa kalite fason fer. Osi akoz adilt pa kontan sa. Mon met toulede.”

Annadrey in deza partisip dan plizyer konpetisyon poenm avan kot in ankor ganny pri menm si pa premye. E sa ti letan i ti dan S3.

“Mon’n vwar poenm en fason atraver ki ou kapab eksprim en kantite keksoz. Alor mon’n pran li konman en lar ki mon vreman apresye,” Annadrey i dir.

Annadrey i dir ki son bann mo dan poenm i vin volonter dan latet kot i kapab dir en kantite keksoz lo sa ki i vwar.

Lo sa tenm ki ziri ti donn li Annadrey ti dekrir sa konman gou kot i ti baz li enpe lo moutya. Lo kote son prop tenm pour li avek tit ‘Kot I Ale’, Annadrey i dir i ti baz lo ki mannyer letan pe al vit e akoz i pe al vit.

“Ler ou gete dan mon poenm mon demann en kantite kestyon. Akoz mon obzervan alor mon demande akoz keksoz i koumsa. Mon met li dan mon poenm. Kot mon eksplike akoz mon krwar sa i koumsa.”

michelLo linisyativ Fondasyon Jj Spirit pour organiz bann tel konpetisyon, Annadrey i dir i bon akoz bann zenn ki annan talan i ganny sans eksprim zot.

“Parey dimoun i vwar ou trankil, me apre en sel kou i vwar ou sorti. E sa Fondasyon Jj Spirit ‘talent show’ i en motivasyon pour bann zenn sorti dan sa ‘lakok’ e montre ki zot annan,” i dir.

E la ki konpetisyon in fini, Annadrey i krwar i pou al en kou dan ekrir zistwar vi ki i vreman kontan ekrir. Vi ki son bann ansennyan in vreman apresye sa ki i’n reisi, son lekol pe al entrodwir en ‘poetry club’ pour bann zenn ki kontan ekrir.

Anea Andoise, gran venker dan kategori sanson 12 a 17-an

“Mon ankor dan sok”

Anea Shanillah Michelle Andoise i dir ki i ankor dan sok apre ki in sorti gran venker dan kategori sanson 12 a 17-an dan konpetisyon ‘Sesel I Annan Talan – Eksploziv Talan’.

Anea i annan 12-an, i reste Roche Caïman e i pe lekol Plaisance segonder. I ti deside pour pran par dan konpetisyon apre ki i ti vwar ladvertisman lo televizyon. Anea i dir ki i ti santi li tre eksite ler i ti vwar sa e i ti toudswit al rod en form. Anea pa en manm Jj Spirit me i vreman kontan sante e in deza partisip dan Twinkle Twinkle Little Star. Anea ti sant sanson Take Me Home par Jess Glynne e Reggae par Etana. Dan tou sa parkour Anea ti ganny sipor son paran.

“Mon’n deza partisip dan Twinkle Twinkle Little Star an 2014. I pa ti en konpetisyon me ti en konmansman pour mwan montre mon talan,” Anea i dir.

Konsernan sa sanson ki ziri ti swazir pour li sante, Anea i dir i pa ti konn sa sanson oparavan alor i ti fer resers lo la.

“Mon ti ‘download’ sa sanson, abitye avek li par ‘practice’ li,” i ti azoute.

Ki mannyer Anea ti santi li ler i ti ganny sa premye pri?

“Mon ankor dan sok me mon ti annan gran lespwar mon ti pou ganny premye pri,” i ti dir.

E plan Anea dan le fitir konsernan lanmizik se pour kontinyen annan lentere ladan.

“Akoz san lanmizik lavi pa nanryen. Avek lagras Bondye mon annan lentansyon fer sorti en albonm,” Anea i dir.

Source : Seychelles NATION

Developers: Cyberwave