Breaking News
Home - news - Dimans Kreol Borlanmer i atir en gran nonm piblik

Dimans Kreol Borlanmer i atir en gran nonm piblik

En gran nonm piblik ti ralye pour selebre zot kreolite dan aktivite Dimans Kreol Borlanmer ki ti ganny organize dan distrik Au Cap.

Menm si lo bomaten ti napa bokou dimoun e bann ki ti’n vin sa aktivite ti kapab sirkil mannyer zot oule san tap avek kanmarad, lo apremidi ti en zafer totalman diferan. Dan pti 3er pour al lo 4er apenn si dimoun ti kapab sirkile dan sa lafoul dimoun ki ti’n desann.

Pandan sa aktivite ti annan en gran tonbola kot ti annan divers stalls kot manm piblik ti kapab degiste plizyer pla tradisyonel. Atraver pik bi (lucky dip) bann zanfan ti kapab ganny diferan zouzou ek lezot keksoz.

Lakonpannyen Radyo ek Televizyon SBC ti la prezan pour donn detay lo lanbyans Dimans Kreol Borlanmer pour bann ki pour en rezon ou en lot pa ti kapab vin sa aktivite. Ti osi annan plizyer group ki ti prezan pour met lanbyans avek diferan lanmizik tradisyonnel kreol.

Menm si ti napa bokou lespas pour sirkile bann ki ti la ti vwar lespas pour bouze e danse avek vibrasyon lanmizik.

Pandan ki bann ki ti en pe pli vayan ti pe danse e sante avek performans ki ti pe deroul lot kote dan biro ladministrasyon distrik Au Cap, bann pli aze e menm serten zenn ek zanfan osi ti prefer en lanbyans pli dous e trankil kot zot ti pe zwe bingo.

En zenn madanm 30-an ti dir avek zournalis Seychelles NATION ki «sa lannen mon kapab dir ki mon pe byen fet kreol, akoz isi dan Au Cap mon vwar tou bann keksoz ki lontan mon pa vwar e bann lanmizik ki lontan nou pa tande.»

En msye ki ti la avek son bann zanfan ti dir «mon’n profite pour anmenn mon bann zanfan koumsa zot a war mannyer mon ti grandi e ki mannyer dan lepok ki mon ti zanfan nou ti viv.»

Dimans Kreol Borlanmer in enn ki fer reviv bokou memwar e in kit en bon souvenir dan lespri bann zenn e pandan ki Minis pour Tourizm ek Kiltir ti pe adress bann manm piblik ki ti prezan i ti anonse ki lannen prosen i annan plis sirpriz e plis aktivite pour selebre 30enm Festival Kreol. 6216

Developers: Cyberwave