Breaking News
Home - news - ‘Fanm Dan Zil’, en gran konser par bann fanm Seselwa

‘Fanm Dan Zil’, en gran konser par bann fanm Seselwa

zil

Plizyer fanm Seselwa pour lo lasenn pour sa gran konser ‘Fanm Dan Zil’

Plizyer madanm dan lanmizik Sesel  pe zwenn  avek vedet lokal Joennise Juliette dan son linisyativ pour en konser mizikal ki pou apel ‘Fanm Dan Zil’ ki pou deroule isi pandan Festival Kreol mwan prosen.

Sa konser  ki pou deroul anba tenm ‘Lespwar Pou Demen’, pour konpri zis bann vedet madanm  ki pou mont lo lasenn, pou  fer le 30 Oktob kot Mini Stad, La Promenade. Bann madanm dan lanmizik dan bann pei larezyon ki pou pran par dan Festival Kreol zot osi ekspekte partisip akote sa bann fanm Seselwa.

Enn premye dan Sesel, sa konser pe kordinen par Joennise limenm  ki mye koni koman ‘Larenn Sega‘.

Dan en rankont avek lapres boner sa semenn  kot  i ti donn plis detay lo sa konser, Joennise ti dir ki son bi se pour pli byen valoriz talan bann madanm  ek zenn fiy dan lanmizik e ankouraz bokou plis zot pour vin devan e montre ki zot kapab fer .

«Menm si bann madanm  zot popiler  atraver zot sanson zot osi konn zwe serten lenstriman mizikal ki piblik pa konnen, me sa zour zot a kapab dekouver tou sa bann talan,» Joennise ti dir.

«Sa bann madanm in form en  benn ki  pou akote benn Leko ki pou sel tim zonm pour anmenn lakonpannyman mizikal sa swar,» Joennise ti eksplike.

I ti dir ki parmi bann artis madanm lokal tre popiler ki pou lo lasenn sa swar i Sandra, Tania, Telcy, e plizyer lezot,  10 antou ki’n konfirm zot partisipasyon ziska prezan.

Joennise i dir ki tou madanm i devret ganny sa sipor, ki zot pa devret kanmi pour montre zot abilite e zot talan artistik.

«Mwan osi mon ti kanmi ler mon ti fek konmans sante, mon ti per pour mont lo en stage, mon pa ti konnen ki dimoun pe dir lo mwan. Selman si ou annan sa talan fodre ou pous ou lekor devan. Mon pare pour ed sa bann zenn fiy, donn zot sa bon bagaz pour zot kapab debout lo zot menm,» Joennise ti azoute.

Joennise i dir ki linisyativ pour en tel proze in lontan son rev e i kontan ki minister responsab kiltir in byen akeir sa lide pour anmenn en tel konser pandan 30enm Festival Kreol. I dir in ganny osi bokou sipor avek Konsey Nasyonal pour Lar e plizyer lakonpannyen in osi eksprim lentere pour donn zot sipor me ki i ankor pe esper zot konfirmasyon.

Joennise ti fer remarke ki depi Zilyet sa lannen en tim prodiksyon sa konser dirize par mizisyen Berno Cedras in komans travay lebra kase pour met sa konser ansanm.

Repetisyon pe fer 2 a 3 fwa par semenn kot Teat Nasyonal, Mont Fleuri.

Spektak pou komans 8er diswar e pou ale ziska tar dan lannwit, e  SPTC pou met bis a dispozisyon piblik sa zour.

Joennise pe demann tou Seselwa pour desann sa zour e vin donn sipor sa bann madanm.

Plis detay lo sa konser pou anonse plitar.

 

Uroy Jules

Source : Seychelles NATION

Developers: Cyberwave