Breaking News
Home - news - Fon Lanmal 2016-Mary-vine Pierre meyer zenn stilis

Fon Lanmal 2016-Mary-vine Pierre meyer zenn stilis

lamalMary-vine Pierre avek son koleksyon ‘Maryaz Payanke’ in sorti meyer dan konpetisyon zenn stilis pandan aktivite Fon Lanmal Otour Dife ki ti deroul Sanmdi swar kot lotel Berjaya Beau Vallon Bay.

Mary-vine Pierre, ki en etidyan Seychelles Institute of Art and Design (SIAD) in sorti meyer par devan nef lezot zenn tre talante.

Konman pri, Mary-vine in ranport en tiket avyon avek Ethiopian Airlines ek en brunch pour de kot Restoran Seselwa, Ephelia Resort.

Sa dis zenn stilis ti demontre zot talan atraver bann diferan latwal e anmenn lodyans lo en voyaz depi lepok lesklavaz anpasan par zedmo, lanmizik kreol ziska stil modern ek maryaz.

Dan dezyenm pozisyon avek koleksyon ‘Batik Kreol’ ti Julia Laporte swivi par ‘Mouvman Tropikal’ kree par Nancy Didon.

Lezot partisipan ti Darren Esther (Lekleraz dan lantouraz), Shabira Ally (Langaz an parabol), Tyra Constance (Lafoli anmer), Kadiatou Jabbie (Kreol a lavol), Annabelle Esparon (Leko), Coreen Belize (Lepok lesklavaz) ek Tania Athanase (Kouler kari koko).

Ti osi annan pri pour meyer mannken garson sa swar e sa ti al pour Samuel Asba ek meyer mannken fiy ranporte par Larissa Joseph.

Bann koleksyon ti ganny evalye par senk manm ziri.

Sa sware ti demar avek ladres ansyen minis pour kiltir Alain St Ange ki ti swet byenveni tou bann ki pe donn zot sipor sa bann zenn e osi Festival Kreol.

fon“Bann zenn stilis ki’n met zot ansanm avek bann ankadrer, zot bezwen sa sipor Sesel, sipor tou Seselwa e sipor sa pep ki krwar dan kreolite,” i ti dir.

Minis St Ange ti osi asire ki i pou travay kot a kot avek nouvo minis responsab pour kiltir Idith Alexander pour asire ki bann aki ki i’n fer dan departman kiltir i kontinyen bouz devan.

En manm ziri, Nigel Henrie, ti dir ki zot ti fer sir zot ti evalye kriter ki permet zot fer en bon zizman.

“Prensipalman nou ti pe rod lorizinalite, ki mannyer son kreasyon, son tit ek tou son lantouraz in ganny met lo podyonm tanto,” i ti dir.

I ti dir ki i’n vwar bann bon eleman e sa lannen i meyer kreasyon fer par sa bann zenn stilis, me parkont i ti osi eksprim son dezapwentman lo ki arive apre Fon Lanmal kot sa bann kreasyon i perdi. I ti swete ki sa bann stilis i bouz pli devan.

“Par egzanp sa enn ki’n gannyen mon swete ki mon a vwar bann nouvo marye pe met son lenz,” i ti dir.

I ti dir sa koleksyon ‘Maryaz Payanke’ in sorti venker akoz i demontre sa payanke limenm ek son fler e osi bann lezot eleman artistik ki’n ganny azoute avek sa bann vetman.

Ranpli avek lemosyon Mary-vine ti dir ki son viktwar in vin konman en sok.

“Pour mwan ler mon ti vwar tou koleksyon in fini pare pour al dan show, mon’n vwar ki ti vreman annan en konpetisyon,” i ti dir.

Aze 18-an, Mary-vine i ekspekte aprofondi son letid dan sa domenn, ouver son prop biznes e kontinyen fer son bann kreasyon.

“Ekspekte zot pour vwar bann koleksyon parey e menm pli byen osi pour dimoun e nou zenerasyon kapab fer koleksyon pour marye ladan,” i ti dir.

Ti annan plizyer performans par bann artis tel ki Michelle Marengo, Ion Kid, Sandra, John Wirtz, Reggie, Joenise Juliette ek Joseph Sinon pour anim sware.

Apre konpetisyon ti osi annan moutya popiler otour dife ziska gran maten.

Source : Seychelles NATION

Developers: Cyberwave