Konsey Nasyonal pour Lar i redonn en artis gou pour son lar

Msye Danilo Albert, en artis avek en kondisyon lasante, in reganny gou pour li rekonmans  penn, son pli gran pasyon, la ki i’n ganny  en donasyon diferan  materyo lar avek Konsey Nasyonal pour Lar (Nac).

Ti kot li Anse Royale zis avan Nwel ki sef egzekitif Nac, Jimmy Savy, dan prezans  manm lasanble nasyonal sa distrik Dereck Samson osi byen ki ladministrater distrik Rubina Ernesta, ti prezant Msye Albert avek sa bann materyo ki enkli diferan kalite lapentir osi byen ki kannvas pour penn lo la.

Msye Albert in en pent pour plizyer lannen me apre ki in malad pour sa dernyen 2-an, i pa ti pe pratik lar parey avan. Me la ki son lasante pe gradyelman amelyore, sa artis in deside pour rekonmans penn ankor e avek sa lasistans ek sipor Nac, sa i ava redonn li plis gou dan son lar.

«Nou’n vwar li enportan pour nou esey ede nou osi pour anmenn en diferans dan son lavi akoz Nac i la pour ed bann artis e anmenn en diferans dan zot lavi,» Msye Savy ti dir.

I ti azoute ki i pa fasil ler ou malad e lo en lili toulezour  tousel e i dir i kontan ki Msye Albert pe rekonmans penn akoz sa i ava soulaz li moralman e ede pour li reganny son lasante pli vit.

Lo son kote Msye Albert ti eksprim son gratitid anver Nac pour sa zes pozitiv.
I dir ki i pou rekonmans desinen e penn o pli vit posib e pe menm mazin mont son prop legzibisyon lar posibleman avan lafen sa lannen.

I ti remersye son fanmir pour zot sipor e dir ki i determinen pour li kontinyen bouz devan dan son lar.