Breaking News
Home - news - Lenstiti Kreol Sesel i organiz en latelye pour bann ansenyan primer

Lenstiti Kreol Sesel i organiz en latelye pour bann ansenyan primer

institutAn preparasyon pour kolok enternasyonal 2018, Lenstiti Kreol Sesel in organiz en latelye avek ansenyan P2 e P3 yer bomaten kot Lenstiti Kreol, Au Cap.

Bi sa latelye ti pour edik bann ansenyan pour idantifye bann stratezi efektiv, e apropriye pour ed zelev  sorti an Kreol Seselwa pour al ver Angle.

Bokou ansenyan i rankontre difikilte ler zot pe servi lalang kreol Seselwa ek Angle konman mwayen lenstriksyon oubyen zouti lansenyman.

Sef egzekitif Lenstiti Kreol, Madanm Marie Flora Ben David ti dir dan son lentrodiksyon ki manda sa lenstiti se pour devlop, valoriz e promouvwar lalang Kreol, e sa latelye ti pour ed bann ansenyan e osi idantifye bann stratezi efektif, pour ed bann zelev sorti an Kreol Seselwa pour al ver Angle dan zot letid.

«Ansenyan i rankontre bokou defi ler i pe servi lalang maternel konman zouti dan lansenyman ek laprantisaz sorti an Kreol pou al ver Angle. Nou lalang i nou leritaz, e i nou devwar konman sak endividi pour aprann, prezerv e promouvwar nou lalang,» Madanm Ben David ti dir.

Apre louvertir sa latelye sak ansenyan ti fer en prezantasyon bref lo zot menm e eskplik zot santiman vizavi lalang Kreol Seselwa.

Zot ti osi diskit lo defi ki zot rankontre ler zot pe anseny lalang Kreol, defi ki i annan enn fwa zot pas dan lalang segond (Angle) e zot ti kapab propoz solisyon pour sirmont sa bann defi.

Alafen sa latalye bann ansenyan pou kapab inisye bann nouvo stratezi e trouv solisyon pour bann defi ki zot rankontre dan lansenyman ek laprantisaz.

Bann ansenyan ki ti asiste sa lateleye ti sorti dan bann lekol partou lo Mahe.

Source : Seychelles NATION

Developers: Cyberwave