Breaking News
Home - news - Minis Larue i vizit fasilite lazenes lo bann zil pros

Minis Larue i vizit fasilite lazenes lo bann zil pros

2mitsy

Fitness Extra Gym in pare pour asiste avek progranm ‘SeyX30’ lo Praslin

Minis pour Spor, Lazenes ek Kiltir, Madanm Mitcy Larue, ti vizit fasilite lazenes lo bann zil pros semenn pase.

Sa i dan kad vizit familyarizasyon ki li ek bann diferan teknisyen sorti dan bann diferan seksyon son nouvo portfolio ki i ti pran pli boner sa lannen.

Pour akonpanny Minis Larue lo sa vizit ti konseye spesyal pour lazenes Kevin Vidot, sef egzekitif Konsey Nasyonal Lazenes (SNYC) Alvin Laurence, direkter zeneral ‘youth programme & policy’ Patrick Nicette, e plizyer o zofisye bann lezot departman sa minister ensi ki Churchill Gill ek Wavel Woodcock, manm Lasanble Nasyonal pour le de distrik lo Praslin.

Avek bi anmenm sa trwa konponan son minister ‒ lazenes, spor ek kiltir ‒ pour travay kolektivman, departman lazenes ti profit lokazyon pour vwar bann landrwa potansyel ki enpakte e kapab benefisye bann zenn.

Kot l’Union Estate lo La Digue, sa delegasyon ti ganny sans diskit lo bann meyer fason pour asiste bann zenn antreprener, tel ki Rita Morel, en zenn artis.

Lafason ki bann diferan enfrastriktir ki enportan pour devlopman lazenes i kapab ganny servi pour bann diferan aktivite. Sa i enkli konpleks sportif ek kort l’Union Estate. Lafason ki bann zenn artis i osi kapab ganny asiste pour pli byen epanouir ti osi ganny diskite.

Praslen, kot multi-purpose hall Vijay International School, sizesyon ti ganny fer ki reprezantan lazenes lo sa zil i vin pli aktiv dan sa lekol ki konpri apepre 240 etidyan. Ensi ki posibilite ki sa hall i ganny servi pour lezot aktivite lazenes lo sa zil e sa sizesyon ti ganny byen akeir. Bann lezot fasilite sportif tel ki konpleks sportif Baie Ste Anne, basen naze lo zil Eve, kort volleyball ek basketball Marie-Jeanne Estate i osi parmi lezot ki aport zot soutyen pour sa departman.

Sant Anse Boudin ek Anse Kerlan i osi annan potansyel pour ganny servi pour bann diferan aktivite espesyalman kanpman ek retret lazenes tel ki President’s Award Scheme ek Outreach Programme. Diskisyon ava ganny fer avek bann departman konsernen pour sa. Fitness Extra Gym ti osi pare pour asiste sa departman sirtou avek zot progranm ‘SeyX30’ lo Praslin.

3mitsy

Artis Rita Morel i met devan son bann kontrent ek konsern avek delegasyon

Youth Services Bureau ki trouve Baie Ste Anne i konpri de travayer ki asir fonksyonnman sa sant sak zour. Bann zenn ki frekant sa sant i plito vin rod fasilite enternet ki zot servi lo sa kat ordinater prezan ou menm lo zot prop lekipman portab. Vi ki zot dan visinite sant kominoter, koneksyon ‘free-wifi’ i disponib pour 1 er-d-tan. Par kont, en bes in ganny obzerve dan lakantite zenn ki frekant sa sant e Minis Larue in sizere ki plis zefor i ganny mete pour esey fer sa sant pli atiran e menm organiz bann aktivite ki ava atrakte zenn. Sa sant i osi ofer lezot servis tel ki fotokopi, lasistans avek bann proze pour lekol e lasistans pour fer bann resers.

«Apre serten analiz entern, nou’n vwar ki nou pa pe maksimiz potansyel sa sant. Alors nou pou separ sa sant an de, kot en morso ava ganny servi konman en training room, en fasilite ki vreman an demann lo Praslin, e lot morso ava kontinyelman ganny servi pour ofer nou bann lezot servis abityel,» sef egzekitif Konsey Nasyonal pour Lazenes Alvin Laurence ti eksplike.

Bann sesyon lantrennman i anvizaze konmanse byento.

Youth Services Bureau i osi konpri en lasal separe, ki li pou ganny konverti dan en Youth Health Centre, en fasilite ki sa departman i vwar konman enn vreman irzan.

Bibliotek Nasyonal Baie Ste Anne ek Grand Anse ti osi enkli dan vizit e la ankor Msye Laurence pa ti ezite pour konplimant sa bon kolaborasyon ki annan ant Youth Services Bureau ek bibliotek ek bann nouvo fason ki zot kapab travay an partenarya. Bann travayer ek reprezantan sa departman lo sa de zil ti osi ganny sans pour diskit avek minis ek bann o zofisye lo zot bann konsern ek sizesyon dan en rankont.

«Sa vizit pou aport bokou fri an term bann diferan servis ek loportinite ki nou ofer bann zenn. Lazenes i en departman vas ki annan plizyer fonksyon e alors nou bezwen kolaborasyon plizyer lezot departman. I byen ki sa trwa departman i aprezan tonb anba menm minister ki ava fasilit nou travay,» Msye Laurence ti partaze.

Source : Seychelles NATION/

Teks: Nadia Bedier

Portre: Romano Laurence

Developers: Cyberwave