Breaking News
Home - news - Nouvo travay Jean-Marc pe fer byen lo marse

Nouvo travay Jean-Marc pe fer byen lo marse

Preski 4-an apre son dernyen albonm avek tit Lanmizik i Mazik, artis Seselwa ki tre ganny apresye Jean-Marc Volcy in met en nouvo travay lo marse avek tit En Leokri e ziska prezan lavant pa pe mal ale dapre sa santer e mizisyen.

Sa albonm ki annan 12 sanson tre ritme avek bokou mesaz pour tire ladan e boukou moral par deryer in realize antyerman par Jean-Marc limenm e bann parol osi byen ki stil sa bann sanson i plizoumwen parey labitid savedir pirman Kreol kot bann senaryo ek sityasyon lavi toulezour i ganny met devan.

Dan en pti antretyen avek Jean-Marc sa semenn sa artis i dir ki son albonm, ki ti ariv lo marse enpe letan avan lafet Nwel 2014, pe fer ase byen ziska prezan e bann sanson parey Dyelelo,  Met Delo osi bye ki Sokwe Mtoto, Roul Ponm Damour , I Pa Zoli I Pa Nice pe ganny byen apresye par bann fàn ek piblik an zeneral.

Jean-Marc i dir ki parey dan tou son bann sanson oparavan in ankor abord en pe bann size ki annan pour fer avek moralite, kiltir, sityasyon sosyal ek spirityel osi byen ki lavi.

“Mon’n apel sa albonm En Leokri akoz mon santi i annan en kantite bann problenm sosyal, moral ek mantalite ki fodre dimoun i sanze akoz zot pe detri e gat nou sosyete. I annan plis voler, plis delenkans, dimoun pli ale zot kwar ki i normal pour kas relasyon lezot osi byen ki pour annan lezot partener ek relasyon andeor enn ki normal. Tousala pe vin en fleo e i mal e pa akseptab si nou anvi en sosyete ki solid,” Jean-Marc i fer resorti.

I dir sa enn travay i annan pour bi anvoy en mesaz kler pour dimoun dan sosyete ki pe fer sa bann keksoz e fer zot realize ki sa ki zot pe fer pa byen.

Me menm si in anvoy tou sa bann mesaz pour ed dimoun reflesir lo sa bann fleo ki pe afekte nou pti sosyete, Jean-Marc in osi mazin bann fanm Seselwa dan sanson Josephine.

“Mon’n praise bann fiy ek bann fanm Kreol e mon’n penn en portre ki pou fer zot fyer. Sa bann   ki pe viv an Kreol, ki travay e fer tou keksoz an Kreol, ki kontan zot bred mouroum, ki kontan sant zot  bann sanson Kreol e partisip dan maryaz tradisyonnel,” Jean-Marc ti fer resorti. I ti osi fer remarke ki sa enn sanson i lo en stil enpe pli jazzy.

Fodre dir ki sa i fer son 9enm travay me Jean-Marc i dir i pa pou son dernyen akoz i annan ankor plizyer proze pour lavenir e sa i enkli en spektak pour lans sa albonm.

Albonm Jean-Marc i anvant dan bann landrwa labitid osi byen ki lo portal Seymas an liny.

CD-cover-volcy

Developers: Cyberwave