Breaking News
Home - news - Pa profitab pour Air Seychelles fer vol koneksyon Praslin serten zour lasemenn

Pa profitab pour Air Seychelles fer vol koneksyon Praslin serten zour lasemenn

imagesKantite pasaze ki swa Seselwa oubyen etranze ki swete pran en vol pour al direkteman Praslin apre en vol sorti Moris dan Lendi, Merkredi ek Vandredi i tre ba e sa i fer ki i pa profitab pour Air Seychelles met en vol direk Praslin sa bann ler.
Minis pour Zafer Entern ek Transpor Joel Morgan ti dir sa dan Lasanble Mardi letan i ti pe reponn kestyon poze par manm elekte pour Baie Ste Anne Praslin  Natasha Esther.

Onorab Esther ti’n demann Minis Morgan pour ki rezon napa en vol koneksyon pour al Praslin dan aswar pour fasilit zabitan Praslin ki sorti Moris e ki oule mont Praslin menm zour menm.

Touzour lo size transpor, Minis Morgan ti osi anonse ki depi Avril sa lannen SPTC (Korporasyon Transpor Piblik) pe ofer en servis bis sorti lo lasose Inter Island Quay pour al terminal bis anvil pour benefis bann pasaze ki ariv Mahé lo dernyen voyaz Cat Cocos aswar.

Sa ti larepons en kestyon poze par manm elekte pour bann zil pros Chantal Ghislain. I ti’n demann Minis Morgan pour get dan posibilite met en bis lo lasose Mahé pour fasilit lavi bann pasaze ki bezwen al pran en dezyenm bis pour ariv kot zot destinasyon sirtou apre dernyen voyaz Cat Cocos aswar.

Lo size vol koneksyon pour Praslin Minis Morgan ti dir ki  pour bann vol dan Mardi, Zedi ek Dimans ki sorti Sid Afrik nonm pasaze i ase signifikan pour Air Seychelles ofer en vol direk Praslin.

Minis Morgan ti profite pour anonse ki dan kad nouvo progranm  pour liver 2014 ki pou konmanse  le 1er Desanm, Air Seychelles pou konmans ofer sa servis lo Praslin lo en baz touleswar. Sa pou prezan posib gras a bann nouvo vol rezyonnal ki Air Seychelles pe mete e osi akoz kantite vol ki Emirates i fer Sesel pe double.

Minis Morgan ti osi eksplike ki in diskit avek sef egzekitif Air Seychelles pour met anplas prosedir ki a fer ki dimoun Praslin ki voyaz Moris zot kapab aste tiket direk Praslin-Moris e Moris-Praslin ki ava ede pour ogmant kantite pasaze ki pou pran vol aswar pour retourn Praslin.

“Me problenm i ekspekte rezourd la ki byento pou annan bann vol rezyonnal Dar es Salaam, Mumbai e osi Madagascar,” Minis Morgan ti dir.

Developers: Cyberwave