Breaking News
Home - news - Zil Pros – Disiplin atraver sport

Zil Pros – Disiplin atraver sport

sport«Bann benefis ki sport i anmennen dan nou lavi i telman abondan ki nou pa kapab fini kont tou son byenfe. Nou familye avek sport ki fer dibyen nou lasante, sport i egey nou, sport i rasanble nou, me nou pa koz ase lo vre benefis disiplin ki sport i kapab anmennen dan nou lavi e lo nou karakter.»

Sa ti mesaz ki ti ganny pase dan konpetisyon atletik enterskoler bann zil pros ki ti fer lo La Digue Zedi le 13 Avril sa lannen.  Parey toulezan sa konpetisyon i ganny organize pour finaliz seleksyon bann atlet pour sanpyona atletik nasyonal ki fer an Zen pour komemor lafet nasyonal.

Sa bann konpetisyon preliminer i osi ganny fer lo Mahé. Me bann zenn Praslin/La Digue, zot ti’n demande ki valer disiplin i ganny promouvwar plis kot zot sa lannen e ki i ganny lanse dan sa levennman.  Zot ti fer sorti sa pwen an Desanm ler zot ti pe swazir ki valer zot pou selebre dan kad progranm ‘Valer pour Mwan, Valer pour nou Tou’.

Bann travayer lazenes sa de zil osi byen ki sef egzekitif Konsey Nasyonal Lazenes (SNYC) ti’n zwenn ansanm avek bann organizater e byen sir bann ansennyan ek zelev lekol pour mark sa lokazyon. Lanbyans ti so e tre konpetitiv pandan ki bann atlet lekol Praslin segonder, lekol ‘Vijay International’, lekol La Digue e le de lekol primer Praslin (Grand Anse ek Baie Ste Anne) ti pe mezir zot lafors.

Pandan en poz mizikal, bann mesaz ti ganny pase. Lanfaz ti ganny mete lo lenportans annan sa disiplin dan latrennman. «En bon atlet i annan sa bon disiplin pour pran son lantrennman serye ; se sa ki vin labaz pour vin en sanpyon,» enn manm organizater, Msye Wilfred Adrien, ti fer remarke.

«Nou devret fer plis ankor pour ed bann zenn retenir sa disiplin dan sport si nou anvi zot vin en sanpyon demen,» i ti azoute.

Malgre en soley byen for, lanbyans ki bann siporter ti pe mete ti pli for ankor.  Performans bann atlet in osi byen prometan e sispans, sispans pour le 18 Zen lo Mahé. Sa ti osi dernyen aktivite lo kalandriye lekol pour sa premye term lo nou bann zil pros.

Bann portre ki akonpanny lartik i montre en pe lanbyans pandan sa aktivite sportif.

Developers: Cyberwave