Breaking News
Home - National Highlights - Eski annan plis larzan i neseserman redwir lapovrete?

Eski annan plis larzan i neseserman redwir lapovrete?

larzanPour konmemor Lazournen Enternasyonal pour bann Madanm, en prezantasyon ti ganny fer avek bann madanm dan distrik Mont Buxton.

Sa rankont ti ganny organize par Marie-Ange Denis ki reprezantan bann madanm Mont Buxton e osi en ners par profesyon.

Madanm Denis ti dir ki sa rankont ti en loportinite pour selebre lakonplisman bann madanm me anmenmtan fer bann madanm konsyan akoz toultan nou pe tann koz lo laprovrete me napa ase lenformasyon deor.

«Bokou i tonm lo bann endividi avek lafanmiy e fodre ki zot pran responsabilite anver zot zanfan pour anpes sa bann ogmantasyon problenm sosyal koze par labi lalkoz, drog, vyolans domestik ek lezot ankor,» i ti dir.

Sete konsiltan Andy Jean-Louis ki ti fer sa prezantasyon Mardi dan biro ladministrasyon sa distrik.

Sa prezantasyon ti lo sa Poverty Estimate Study ki Labank Mondyal ti fer an 2013 e ki rezilta ti montre ki anba 40% dimoun ti pe viv dan laprovrete Sesel.

Zot ti pe get laprovrete dan en perspektiv pli larz, pa zis lo reveni me plito lo sa seri mezir ki Prezidan ti anonse dan son diskour Leta Lanasyon.

«Nou pe vwar ki si ou met tou sa bann mezir ansanm sa sif ki sa letid ti vin avek an 2013 ki ti 40% pou redwir konsiderableman e en mwayen ki en dimoun pou fer par lannen i apepre R15,000 anplis. E kestyon ki nou ti pe demande dan sa sesyon i ler dimoun i annan plis larzan e napa dimoun anba poverty line eski sa i vedir ki napa laprovrete Sesel?. Nou pa sipoze pe get zis reveni me osi lezot fakter dan zwe,» i ti dir.

I ti azoute ki menm si Sesel i annan tou bann nesesite debaz nou toudmenm ankor vwar en kantite dimoun ki tonm dan drog, lalkol e kontribye pour fer plis problenm sosyal e ki anretour tousala i tonm lo lafanmiy pour fer ki zot pa fonksyonn byen.

En zabitan Mont Buxton, Lydia François, ti dir bann pwen ki’n ganny fer sorti i byen enteresan.

«Sa bout kot i konmans avek zanfan dan lafanmiy mon krwar ki nou sipoze ranforsi plis bann lalwa lo zanfan dan lekol pour fer zot ganny pli disiplinen e mon krwar ki sak distrik i devret travay lo en proze pour anmas sa bann zanfan difisil e ede met zot lo semen drwat,» i ti dir.

Source : Seychelles NATION

Developers: Cyberwave