Breaking News
Home - news - Bann etidyan primer i aprann lenportans lalang maternel

Bann etidyan primer i aprann lenportans lalang maternel

2lalangPour konmemor Lazournen Enternasyonal Lalang Maternel, Younit Lalang kot Lenstiti Enternasyonal Kreol in organiz aktivite avek bann zanfan primer.

En karantenn zanfan sorti lekol Au Cap, Anse Aux Pins, Cascade ek Pointe Larue ti ganny plase dan bann group pour fer bann aktivite parey dan paz ‘Varyete Kreol’ ki aparet dan Seychelles NATION tou le Mardi.

Zot ti ganny montre ki mannyer sa lenstiti i prepar sa bann paz ki enkli lekritir – zistwar, poenm, lekritir komik pour desin Milor, devinet, mo krwaze ek mo melanze.

Sa bann aktivite ti deroul dan form en pti konpetisyon par lekol e ti annan de kategori.

Bann gannyan ti resevwar materyo lekol sponsor par Lotorite Laviasyon Sivil Sesel.

3lalangResponsab Younit Lalang, Erica Fanchette, ti dir ki sa bann aktivite i ganny fer pour promouvwar lalang maternel, pour esplik zot son lenportans e pour zot konpran ki lalang kreol i parey nenport ki lalang ki annan son vokabiler, son gramer ek son larises ki tou lalang i annan.

Sa bann aktivite in pran plas toulezan pandan sa dernyen 15-an eksepte lannen pase akoz zot ti pe travay lo proze ‘Eple Byen’.

«Annefe sa i en proze ki ti pe osi promot lalang kreol donk nou pa ti organiz aktivite pour bann zanfan lekol akoz nou ti bezwen pas dan lekol pour esplik zot mannyer pour servi sa ‘Eple Byen’. Sa lannen nou’n fini donn zot zouti e la i le moman pour nou al vwar si zot in servi  sa zouti ki nou’n donn zot akoz la nou annan tou nou bann mo ki nou annan dan twrazyenm volim Leksik e zot pou esey servi sa bann mo pour fer sa bann aktivite,» i ti dir.

Lazournen Enternasyonal Lalang Maternel i ganny selebre le 21 Fevriye.

Bann portre ki akonpanny lartik i montre bann zelev pandan bann travay an group.

Source : Seychelles NATION

Developers: Cyberwave